Navy lawng lian vawi hnih an kap

Yemen-a Houthi helpawlte awmna hmun aṭangin US Navy destroyer, USS Mason chu missile hmangin Pathianni khan kah a ni a, Nilaini khan kah a ni leh bawk. Hemi chhan let nan hian nimin khan US sipaite chuan cruise missile hmangin Houthi-te thuneihna bial chhunga radar site pathum an kap let.

Pentagon thupuangtu, Captain Jeff Davis chuan lawng awmna lam hawia missile kahchhuah hian US Navy lawnglian hi an fuh lo ve ve niin a sawi a, lawng chhia a awm lo a, lawng sipai zingah hliam an awm lo bawk niin a sawi.

Defence official-te chuan missile kahchhuah a nih lai hian lawng hi Bab al-Mandeb Strait-ah a awm tih an sawi a, helai hmun hi Suez Canal kaltlanga Europe pana kal, oil tanker-te luhka ber a ni.

Nimina US sipaiten Houthi awmna bial chhunga cruise missile an kahchhuah hi President Barack Obama thupek anga kalpui a ni a, hei hi an lawng leh a thawktu venna atana tih a nih thu Pentagon thupuangtu chuan a sawi.

Houthi helte hian tun thla tir lam khan Bab al-Mandeb Strait-ah hian lawnglian an lo kapchhe tawh bawk. Helho hian kar kalta Inrinnia an ram khawpui, Sanaa mitthi vuina hmuna bomb thlak vanga mi 140 thihna thleng vanga phuba an lakna nia rin a ni. Bomb thlak vang hian mi 500 chuangin hliam an tuar a ni.

Yemen ramah hian Saudi Arabia kaihhruai ṭangrual ramte chuan Yemen President Abd Rabbu Mansour Hadi-a sorkar thlawpin, Houthi hel lakah hian beihpui an thlak mek a ni.