Khawvel lawrkhawm
Mynamar ramria inbeihna thlengah mi 26 thi
Myanmar-a Bangladesh ramri bula police leh Rohingya Muslim nia hriatte inkara inbeihna thleng avangin mi 26 an thi tawh.
Myanmar khawthlang lam, Rakhine state-a Bangladesh ramri-a border police post pathum chu Pathianni khan mi ṭhenkhatin beiin police pakua an that a, mi dang panga in hliam an tuar bawk. Police beitute hian an ralthuam kawl eng emaw zat an laksak bakah silaimu 10,000 chuang zet an la bawk.
He thil thlen hnu hian sipai leh police ṭhahnem tham tak chu Rakhin hmarlam, Muslim tamna Maungdaw khuaah hian tirh nghal an ni a, mahse helai hmuna cheng mi 300 chuang zette chuan security force-te hi pistol, chem leh ngunhnam nen lo dan tumin an lo bei a ni. An inbeihnaah hian police-te chuan mi 26 an kaphlum a ni.
National Citizens Service Trust tan Cameron thawk dawn
Britain Prime Minister hlui David Cameron chuan 'Big Society' siam tura a hmalakna kawng khat atan, hlawh nei loin National Citizens Service Trust tan a thawk dawn tih a sawi.
Kum 50-a upa, Conservative Party hruaitu hlui hi Brexit chungchanga a campaign-na a hlawhtlin loh avangin Britain PM a nihna leh, MP a nihna aṭangin a lo bang tawh a ni. PM a nih laia bul-
ṭan, National Citizens Service-a tleirawlte huam telna tur 'Big Society' siam turin a thawk chhunzawm a ni. NCS in a tum ber chu team-building activity leh community project kaltalnga tleirawl zawkte hna an thawhna tur kawnga lo buatsaih a ni. Cameron hi NSCP Patron chairman a ni dawn a, he scheme hi tleirawl zawng zawngte an hman theih tura beih an tum a ni.
China sipaite thil phut ngaihtuah tiam
China thuneite chuan Beijing-a nawrh huaihawt, sipai bangte thil phut chu ngaihtuah sak an tiam.
Nilaini-a Beijing-a nawrh huaihawt zingah hian China-in a sipai neih zat tihtlem a tumna kawnga ban tak ṭhenkhat pawh an tel. Thuneitute chuan sipai bangte harsatna tawhte chu chinfel sak an tim a, sorkar pawhin an dinhmun siamṭhat sak na tur hian policy a duang mek niin an sawi. China sorkar an ram sipai awm zat, maktaduai 2.3 chu nuai thuma tihtlem a tum a ni.