Palestinian thlawpna lantira nawrh huaihawtte man

New York, US-a Columbia University main library chhungah an ram huna Nilaini khan mi eng emaw zat chuan hmaituamin Palestinian thlawpna lantirin nawrh an huaihawt a, lehkhabu bawm leh hmun dangahte Palestinian flag an tar zui bawk.

Nawrh huaihawtte hian university security guard-te paltlang luiin bulding chhungah hian an lut a, guard-te nen pawh an innawr buai a ni. Mahse, library chhungah hian an lut lui a, university safety officer pahnihin hliam an tuar.

Library chhunga Palestinian thlawptute an luh luih hnu hian New York police-te tirh an ni a, nawrh huaihawtte hi hruai chhuakin an zinga mi eng emaw zat an man. Hemi hnuah pawh building pawn lama gate bulah mi eng emaw zat pungkhawmin, 'Free Palestinine' tiin an la au zui bawk a ni.

University acting president, Claire Shipman chuan library chhunga nawrh huaihawt, hmai tuamte hi a nihna hriattir tur leh an awmna chhuahsan turin an ngen a, mahse an ngenna hi an zawm duh lo tih a sawi. Hemi hnu hian school chuan New York police-te hi an building leh university chhung himna tura hma la turin an ngen tih a sawi. Nawrh huaihawtte chet dan chu a demawm tak zet tih sawiin, final exam tura inbuatsaih zirlaite an tibuai hle a ni, a ti.

New York governor Kathy Hochul chuan campus chhunga nawrh huaihawtte chu a dem thu a sawi a, 'Tu pawhin democracy kalphung hnuaiah, boruak muanawm tak hnuaia nawrh huaihawt tur chuan dikna chanvo an nei. Mahse thil ti chhe zawng leh mi dang tana hnawksak zawnga chet chu pawm theih a ni lo," a ti. US secretary of state Marco Rubio chuan library chhung lut lui, zirlaite visa status chu enfiah mek a nih thu a sawi bawk a, 'Hamas thlawptu, firfiak taka chete chu kan ramah lawm an ni tawh lo," tiin a sawi.