NKorea-in missile eng emaw zat kap chhuak

North Korea chuan nimin khan a ram khawchhak lam tuipuiah short-range ballistic missile eng emaw zat a kap chhuak niin South Korea chuan a sawi.

South Korea sipai official-te chuan nimina NKorea ralthuam enchhin hi Ukraine nena indo mek, Russia hnena ralthuam a thawn chhuah tur nen inzawmna a nei niin an sawi. South Korea Joint Chiefs of Staff chuan missile eng emaw zat hi an ram huna zing lam dar 8:10-9:20 khan khawchhak lam lawngchawlh hmun pawimawh, Wonsan aṭanga kah chhuah a nih thu sawiin, a hla ber hian km 800 vel thleng a kap fuh thei a ni, an ti. Missile an kah chhuah zat tak erawh a sawilang lo.

Joint Chiefs chuan US leh SKorea intelligence lam chuan NKorea-in missile kah chhuah tuma a inbuatsaih laia an hriatchhuah thu leh, a missile kah chhuahte pawh a chhui zui nghal thu a sawi. Hemi chungchang hi Japan pawh hriattir ve nghal a ni tiin, NKorea thiltih chu an bial chhunga boruak muanawm tih chhiat theihna a ni, a ti.

Japan defence minister Gen Nakatani chuan nimina NKorea missile kah chhuahte hian Japan economic zone an thleng lo tih sawiin, lawng leh thlawhtheihna tih chhiat engmah a nei lo, a ti. NKorea chet dan chu na taka a dem thu a sawi bawk.