Pope Leo XIV in Sistine Chapel-ah Mass buatsaih

Roman Catholic kohhran hruaitu lu, pope thar atana thlan Pope Leo XIV chuan nimin khan Sistine Chapel-ah pope a nih hnua a hmasa ber atan mass a buatsaih.

Pope Francis a thih avanga a thlaktu tur, pope thar thlanna hi Nilaini, May 7 aṭang khan neih ṭan a ni a, ram 70-a cardinal 133-te chuan an kohhran hotu thar tur hi an thlang a ni. Vote thlak ni khat niah thlan tlin an nei lo,mahse a ni hnihna Ningani zanah Cardinal Robert Francis Prevost chu thlan tlin a ni ta a ni. Pope hian vote 133 aṭangin hmun thuma ṭhena hmun hnih a hmuh a ngai a ni. Pope thar hian a hming atan Leo XIV a thlang a, pope 267-na a ni.

Pope Leo XIV hi Chicago, US-a piang niin American zinga pope ni thei hmasa ber a ni. Mahse kum tam tak Peru-ah missionary hna thawka a awm avangin Latin America cardinal anga sawi a ni fo bawk. Peru hmar thlang lamah Trujillo-ah kum 10 chhung chu parish pastor leh zirtirtu hna thawkin a awm. Spanish leh Franco-Italian thlah, Pope hi altar boy ni ṭhinin kum 1982 khan ordain a ni. Ordain a nih aṭanga kum thum hnuah Peru lamah insawn mah se, US-ah rawngbawlin a kir fo ṭhin. Kum 2014 khan Pope Francis chuan Peru-a Bishop of Chiclayo atan a ruat a, kum 2023 January thla khan archbishop niin, a hnu thla rei loteah Francis chuan cardinal-ah a dah.

Pope atana thlan hian an hming hman duh an thlang ṭhin a, Leo tih hmang hnuhnung ber chu kum 1878-1903 inkara mi, Pope Leo XIII kha a ni.