Israel-in East Jerusalem-a UN school paruk a khar

Israel sorkar chuan East Jerusalem-a UN school paruk chu Ningani khan a khar sak. Israel police leh Education Ministry official-te chuan school khar tur hian thla hmasa khan hriattirna an lo ti chhuak tawh a, ni 30 chhung hun an pek chu Nilaini khan tawpin, Ningani khan an kharsak ta a ni.

United Nations agency for Palestinian refugees, UNRWA chuan heng school parukte hi a enkawl a, hei bakah Israel-in a luah West Bank-ah school dang pawh an enkawl bawk. West Bank-a school te erawh khar an la ni lo.

Israel hian kum 2023, October 7-a Hamas firfiakten Israel an beihna avanga Gaza Strip-a indona a thlen hnuah, UNRWA hi Hamas thlawpah puhin kumin January khan a ram chhungah hna a thawh a lo khap tawh a ni. UNRWA school-ahte hian Juda leh Israel huatna lam hawi inzirtir a ni ṭhin bawk niin a sawi a, mahse UNRWA chuan a puhna hi a pha thung.

UNRWA hi East Jerusalem-a Palestinian raltlante zirna leh health care lam buaipuitu ber a ni. A school enkawl paruk khar hian zirlai 800 vel a nghawng dawn a ni. Mahse Israel chuan UN school khar taka zirlaite hi Jerusalem-a school dangah sawn an ni dawn tih a sawi. Ministry of Education chuan heng school-te hi license nei loa siam a ni tih a tarlang.