NKorea hotuin Russia embassy a tlawh

North Korea ram hotu, Kim Jong-un chuan nimin khan an ram khawpui, Pyongyang-a Russia embassy a tlawh a, a fanu a hruai a ni.

Kim Jong-un hian Russia-in Indopui II-naa Soviet Union-in Nazi Germany a hnehna ni, Victory Day lawmna neih pualin embassy hi a tlawh tih state media chuan a sawi. North Korea chuan hun rei tak aṭanga Russia nena inlaichinna an lo neite a zahin tih hmasawn zel a tum a, an thawhdunna chu tih chhiat theih a ni lo tiin Kim chuan a sawi.

NKorea leh Russia hian inlaichinna ṭha tak neiin, NKorea hian Russia-Ukraine indona thleng mekah Russia pui turin a sipai sang tel a lo tir tawh a, hei bakah artillery ammunition leh missile pawh a thawn bawk. North Korea sipai chu Russia an puihnaah indonaah an thi tawh niin South Korean intelligence chuan a tarlang. NKorea hian satellite siamna lamah Russia aṭangin puihna dawng ve bawk.

Russia hian nimin khan Victory Day vawi 80-na lawmin, Moscow-ah military parade pui tak neiin China president Xi Jinping chuan a hmanpui a ni. Parade-ah hian China sipai leh North Korea sipaite pawh an tel.