Thailand lal King Bhumibol a thi

Thailand lal, King Bhumibol Adulyadej chu hun rei tak a dam loh hnuin Ningani khan a thi.

Bureau of the Royal Household chuan kum 88-a upa, King Bhumibol hi Ningani tlai dar 3.52 khan Bangkok-a Siriraj hospital-ah a thi tih a puang. He hmunah hian hun eng emaw chen kalta aṭang khan enkawl a lo ni tawh a ni.

King Bhumibol, King Rama IX of Chakri dynasty tih bawk hi khawvela ram khat roreltu ni rei ber a ni a, a fapa kum 63 mi, Crown Prince Maha Vajiralongkorn chuan a ai a awh dawn a, King Rama X a ni dawn a ni. Prince Vajiralongkorn hi King Bhumibol fapa neihchhun a ni a, kum 1972 khan Palace Law hmangin a pa lalṭhuthleng rochungtu tur, Crown Prince atan ruat a ni.

Prime Minister Prayut Chan-o-cha chuan Thailand mipuite chu an lal thi ta chu kum khat chhung sun turin a ti a, nimin
aṭang khan Thailand flag-te pawh a ngul chanve-ah zarin, thla khat chhung an zar ang.

Kum 1946-a Thailand ram lal ṭhuthleng luahtu, King Bhumibol hi kum 1927 khan Cambridge, Massachusetts, US-ah a piang. Laussanne, Switzerland-ah seilianin, kum 1928 khan a u, King Anand Mahidol, King Rama VIII chu Thailand-ah a zui a ni. Mahse a u hi kum 21 mi chauh nia a thih tak avangin kum 1946, June 9 khan Prince Bhumibol hi a u aiawh turin ruat a ni.

Kum 1950 khan Queen Sirikit Kitiyakara nen inneiin, fa pali - mipa pakhat leh hmeichhia pathum an nei.

King Bhumibol hi Thailand ramin hma a sawnna tura thawk nasa tak a ni a, a bikin agriculture leh irrigation sector lama a hmalakna te chuan hriat a hlawh hle a, a rorel chhung hian heng sector-ah hian development project 4,000 chuang zet a siam a ni. Ram mipuite ngainat leh ngaihsan a hlawh a, a damloh chhung pawhin an ram mipuite chu an lal dam ṭhatna atan hian an ṭawngṭai nasa hle.