Colombia sorkar leh FARC-te'n inkahhai puang chhunzawm

Colombia sorkar leh FARC helten inremna an siam chu ram mipuiten hnawl mah se, inremna an lo ziah tawh siamṭha tura hun tam zawk an neih theih nana inkahhai an puan chu kumin kumtawp thlenga pawhsei a ni.

Sorkar leh helpawl te hian thla hmasa khan inremna an lo ziak tawh a, mahse ram mipuite ngaihdan laknaah inremna an siam dan duh lotu an tam zawk. Hei vang hian sorkar leh helpawl aiawhte hi an inbe ṭha leh dawn a ni.

Colombia President Juan Manuel Santos chuan inremna an siam dan duh lo tu, eptu pawl hruaitut pawh a lo kawm tawh a, Cuba khawpui Havana-ah FARC hruaitute a hmu leh ang.

Inkahhai puan hi October 31-a tawp tur a ni a, mahse President Santos chuan Bogota-a inremna siam thlawptuten kawngzawh an neiha a huaihawttu, zirlai hruaitute a kawm hnuah pawhsei hi an tum ta tih a sawi. Zirlai leh ṭhalaite chuan tualchhung buaina tihtawp an duh a, silai hmehpuah ngaia awm an duh tawh lo a ni, a ti.

Kum 52 zet sorkar laka lo hel tawh, FARC nena inremna siampui tuma a beihna avang hian President Santos hi chawimawina sang, Nobel Peace Prize dawng tura thlan a ni. President hian Chawimawi≠nain a ken tel, pawisa fai ṭhahnem tham tak chu an ram tualchhung buaina chhuak tuartute chhawmdawlna atana a hlan tur thu a sawi tawh bawk.