Boko Haram-te'n an mi mante chhuah

Nigeria helpawl, Boko Haram-te'n kum hnih liamtaa Chibok-a school naupang, hmeichhe tleirawl 200 chuang an man zinga mi 21 te chu Ningani khan chhuah zalen an ni.

Nigeria President thupuangtu chuan tleirawl 21 chhuah takte hi Department of State Services (DSS) te kutah an awm tawh niin a sawi. Helhoin an mi man
ṭhenkhat an chhuah tak hi International Red Cross leh Switzerland sorkar hmalaknaa Nigeria sorkar leh helpawlten inremna siam tura inbiakna an neih rah a ni, a ti. Inbiakna hi neih chhunzawm zel a nih tur thu a sawi bawk.

Ningani khan sipai helicopter hmangin Nigeria hmarchhak lam, Borno state aṭangin hruai chhuah an ni.

Kum 2014, April 14 zan khan Boko Haram hian Borno state-a Chibok khuaa Girls Secondary School beiin, school naupang hmeichhe 276 an man a ni. An zinga mi 57 te chu an tlanchhuak a, 219 chu an chin hriat lohin an awm zui ta a ni.

Boko Haram hi kum sarih zet an hel a, hmarchhak bial≠ah an insawrbing a ni. Kum sarih chhung hian helho pawikhawihna avang hian mi 30,000 chuang an thi tawh a, mi sing tel chu hmun him lamah an tlanchhe bawk niin sorkar chuan a sawi.