Khawvel Lawrkhawm

China-in Bangladesh hnenah loan dollar tld 24 pe dawn

China chuan Bangladesh hnenah loan dollar tluklehdingawn 24 hu a pe dawn. He loan hi power plant, seaport leh railways siamna kawnga a puihna tur a ni.

China President Xi Jinping chuan nimin khan Bangladesh hi a tlawh a, kum 30 chhunga China President zin hmasa ber a ni. A awm chhung hian loan pekna tura inremna hi ziahfel tum a ni. China hian Bangladesh-a project 25 vel thawhna tur sum tumsak a tum a, heng zingah hian 1,320 megawatt (MW) power plant siamna tur pawh a tel. China-a Jiangsu Etern Co Ltd chuan Bangladesh power grid tihchakna tura thawhdunna tur, dollar tluklehdingawn khat hu inremna an lo ziak tawh bawk.

Israel President-in Muslim leh Juda hruaitute kawm

Israel President Reuven Rivlin chuan Ningani khan Muslim leh Juda hruaitute chu president chenna inah a kawm.

Meeting-ah hian Israel Sephardic rabbi hotu, Palestinian Authority-a Sharia Court president bakah West Bank-a rabbi pahnih an tel. Remna leh muanna awm theihna tura hmalak dan te, sakhaw behchhana tharum thawhna thleng
ṭhin tihtawp a nih theih dan turte an sawiho a ni. Meeting chungchang hi puanzar vak a ni lo a, Palestinian sakhaw hruaitute telte pawhin an thla an laksak an duh lo bawk. Mahse President Rivlin chuan an meeting chu tunhnaia meeting neih tawhah la pawimawh ber niin a sawi.

Maldive-in Commonwealth a chhuahsan

Maldive ram chuan Commonwealth a chhuahsan. British awp tawh ram 53 intelkhawm, Commonwealth hian kum 2012-a Maldive rama tualchhung buaina thleng vanga President aṭanga Mohamed Nasheed-a paihthlak a nih avang leh, politics buaina chinfel kawnga hma a sawn chak loh avangin Maldive hi hremna pek an rel an ni. Hei vang hian Maldive hi a lungawi lo hle a, Commonwealth rorel dan chu a dik lo tih sawiin a chhuak ta a ni.