Covid-19 vaccine pechhuak ram pun belh zel
Khawvela hripui leng mek, Covid-19 hri kai chu mi maktaduai 80 an tling tawh a, he hri vanga thi hi mi maktaduai 1.73 an chuang tawh bawk.
Covid-19 vaccine siamchhuah tawh zinga Pfizer/BioNTech, Moderna, Sputnik V leh Sinopharm vaccine te chu ram eng emaw zatin pawm tawhin, mipuite hnenah an pe chhuak ṭan tawh a ni. December thla tir lamah United Kingdom chuan mipuite hnenah vaccine hi pe chhuak ṭanin, khawvela Covid vaccine pe chhuak hmasa ber ram a ni. Hemi hnu hian ram eng emaw zatin vaccine hi an pe chhuak tawh a, Europe
ram tam zawk chuan a rualin December 27 aṭangin vaccine hi an pe chhuak ṭan.
Covid vaccine pe chhuak tawhte :
UK : UK hian December 8 khan kum 90 mi, Margaret Keenan chu Pfizer/BioNTech Covid-19 vaccine a pe a, khawvela he vaccine dawng hmasa ber a ni. Hemi hnu hian kum upa lam, medical worker leh nursing home-a thawkte hnenah vaccine hi pek chhunzawm a ni.
UAE : United Arab Emirates chuan December 14 aṭang khan an ram khawpui, Abu Dhabi-a chengte tan coronavirus vaccine a pe chhuak ṭan. UAE hian Pfizer/BioNTech vaccine bakah China siam, Sinopharm vaccine chu hman turin a pawm tawh.
USA : USA pawhin December 14 khan Pfizer/BioNTech vaccine a pe chhuak ṭan a, New York City-a critical care nurse Sandra Lindsay chu American zinga he vaccine la hmasa ber a ni. US hian Moderna siam vaccine pawh a pawm tawh bawk.
Canada : Canada ramah pawh December 14 vek khan Quebec khuaa mi, kum 89 mi hnenah Pfizer vaccine chu a hmasa ber atan pek a ni. Canada pawh hian Moderna vaccine pawh a pawm tawh bawk a, kar liam ta kartawp lam khan Moderna vaccine chuan an ram a thleng tawh a ni.
Saudi Arabia : Arabian Peninsula-a hri leng tuar nasa ber, Saudi Arabia chuan December 17 aṭang khan Pfizer/BioNTech vaccine a pe chhuak ṭan.
Israel : Israel prime minister Benjamin Netanyahu chu December 19 khan an rama Covid-19 vaccine pek chhuah bul ṭan nan vaccine hi pek a ni.
Qatar : Qatar chuan December 22 aṭang khan an ram mipuite tan a thlawna Pfizer/BioNTech vaccine pekchhuah hna a kalpui ṭan. Qatar hian Moderna leh Oxford-AstraZeneca vaccine te pawh a pawm tawh bawk.
Mexico : Mexico chuan December 24 aṭangin vaccination programme a kalpui ṭan a, nurse Irene Ramirez hnenah a hmasa ber atan vaccine hi pek a ni.
Kuwait : Kuwait ramah pawh December 24 aṭang khan vaccination campaign kalpui ṭan a ni. Mipuite hnena semchhuah tur Pfizer/BioNTech vaccine hi dose 1,50,000 a dawng tawh a ni.
Chile : Chile hi Mexico dawta Latin America ram zingah vaccine pe chhuak hmasa ber a ni a, December 24 aṭangin a pe chhuak ṭan.
Russia : Russia chuan an rama siam, Sputnik V vaccine chu September thla aṭang khan mipuite hnenah a pe chhuak tawh tih a sawi. Mahse Sputnik V vaccine hi phase-three trial neih zawh hmain Russia hian hman turin a pawm a, hei hi world health organisations leh scientist-te chuan an lo sawisel tawh a ni.
Switzerland : December 23 aṭang khan Switzerland-ah Pfizer/BioNTech vaccine pek chhuah ṭan a ni.
Costa Rica : Costa Rica chuan Pfizer-BioNTech vaccine an dawn hnuah, December 24 khan kum 91 mi, tar enkawlna hmuna awm Elizabeth Castillo hnenah vaccine hi a pe.
Hungary : Hungary sorkar chuan December 26 aṭang khan Pfizer-BioNTech vaccine chu healthcare worker-te a pe ṭan.
Germany : December 26 aṭangin Germany-a Saxony-Anhalt state-ah vaccination programme kalpui ṭan a ni a, kum upa lamte pek hmasak an ni.
Slovakia : Slovakia chuan an ram mipuite hnenah December 26 aṭang khan Pfizer-BioNTech vaccine a pek chhuak ṭan.
Oman : Oman ram chuan December 27 aṭangin coronavirus vaccine a pe chhuak ṭan a, health minister chu a hmasa ber atan vaccine hi pek a ni.
Czech Republic : Czech Republic ramah December 27 aṭangin Pfizer-BioNTech vaccine pek chhuah ṭan a ni a, prime minister Andre Babis chu a hmasa ber atan Prague-a Central Military Hospital-ah vaccine hi pek niin, vaccine sem chhuah tur hi dose 9,750 in an ram a thleng tawh a ni.
Italy : Italy ram pawhin December 27 aṭangin vaccine hi a pe chhuak ṭan a, nurse Claudia Alivernini chu Italy rama he vaccine dawng hmasa ber a ni.
Cyprus : December 27 aṭangin Cyprus ramah coronavirus vaccine hi pek chhuah ṭan a ni bawk a, an ram khawpui Nicosia-ah pensioner-te chu pek hmasak an ni.
Spain : Central Spain-a tar enkawlna hmuna cheng, kum 96 mi hnenah December 27 khan an rama a hmasa ber turin Covid-19 vaccine pek a ni.
Denmark : Denmark ram pawhin December 27 aṭangin vaccine a pe chhuak ṭan a, tar enkawlna hmuna awm, kum 79 mi Leif Hasselberg hnenah vaccine hi pek hmasak ber a ni.
Romania : December 27 aṭangin vaccination programme kalpui ṭan a ni a, Bucharest-a Matel Bals Institute-a nurse chuan vaccine hi a dawng hmasa ber.
Poland : Poland ramah pawh December 27 aṭangin coronavirus vaccine pek chhuah ṭan a ni a, an rama vaccine pek hmasa ber chu Interior Ministry hospital-a head nurse, Alicja Jakubowska a ni.
Malta : State hospital nurse hnenah December 27 khan vaccine hi pek a ni a, EU member ramten a ruala vaccination programme an kalpui rualin Malta pawh hian vaccine pek chhuah hi a ṭan ve a ni.