Khawvel lawrkhawm

Myanmar-ah lunghlu ton 175-a rit laichhuak

Myanmar rama miner-te chuan nimin khan khawvela lunghlu hring lian ber, jade ton 175-a rit chu Kachin State-a lunghlu khurah an laichhuak a, a hlut zawng hi US dollar maktaduai 140 man vel a ni.

Kachin state-a lunghlu hring chi an laihchhuah hi feet 9-a sang leh feet 18-a sei a ni a, khawvela lunghlu zinga a lian ber dawttu a ni. Khawvela lunghlu hring chi lian ber chu China-a Jude Buddha Palace-a ton 260-a rit a ni.

Trump-a'n drug test neihpuiah Clinton-i a cho

US President thlanna neih tura Republican party candidate, Donald Trump chuan presidential debate neih leh hmain a khingpui, Democratic party candidate Hillary Clinton-i chu drug test neihpuiah a cho.

Trump chuan debate an neih hnuhnun berah khan Clinton-i chu a chet ṭhat theihna tura drug hmangah a puh. November thlaa President thlanna neih turah, media mite chuan Clinton-i a tlin theih nan amah chu beiin, a campaign a buaina theihna tura thu dik lo report ṭhinah a puh bawk. Presidential debate vawi thumna hi Nilaini zan hian an nei leh dawn a ni.

Brazil-ah sai enkawlna hmun hawng

Brazil ramah sai enkawln tur bik hawn a ni a, Latin America rama a hmasa ber a ni.

Sai enkawlna hmun tur hi Brazil khawthlang lam, Mato Grosso state-ah siam a ni a, ram acre 2,800-a zau a ni. He hmunah hian circus-a hman ṭhin, sai 50 vel an awm thei dawn a ni. A ram leina sum hi US-a Global Sanctuary for Elephants in a pek a ni a, dollar maktaduai khat man a ni. He hmun hi mipui nawlpuiin an tlawh theih tura siam a ni lo a, dan loa khawi sai te pawh dahluh tum a ni bawk.