Israel-in UNESCO nena inzawmna titawp

United Nations (UN) cultural agency, UNESCO-in East Jerusalem-a Juda leh Muslim te hmun inchuh mek chungchang a sawi danah Israel sorkar a lungawi lo a, UNESCO nena an inzawmna a chhu chat.

East Jerusalem-a Juda leh Muslim-te'n sakhaw hmun pawimawh an inchuh mek hi Juda-te chuan Temple Mount an ti a, Muslim-te'n Haram al-Sharif an ti thung.

Kar kalta Ningani-a UNESCO thuchhuah chuan, Haram al-Sharif-a al-Aqsa Mosque-a kal tur, Palestinian mite danna tur Israel sorkarin a siam chu a dem thu a sawi a, Muslim moque bula sipai leh police duty tir chu dan dik lo niin a sawi bawk. Sakhaw pa≠hnihte hmun thianghlim chungchang a sawinaah hian Muslim-te sawi dan, Haram al-Sharif tih chauhin a sawilang a, Juda-te sawidan a tarlang ve lo a ni. Hei vang hian Juda sakhua leh he hmun pawimawh tak inzawmna neih chu pawmpui loah puhin, Israel chuan UNESCO nena inzawmna an neih chu a titawp ta a ni.

Temple Mount hi Bible-a lang, Juda temple pahnih leh Western Wall awmna a ni a, Muslim-te chuan he hmun vek hi an zawlnei, Prophet Muhammad-a van lawnna hmun niin an ngai bawk. Sakhaw pahnihte hian he hmun hi hmun thianghlimah an puang ve ve a ni.

Israel Education Minister Naftali Bennet chuan, UNESCO chuan kum sang tel Juda leh Jerusalem-in inzawmna an neih chu a haider a, Islam firfiakte a thlawp zawk a ni, a ti. Israel Prime Minister Benjamin Netanyahu pawhin a Facebook-ah UNESCO chu thutlukna dik lo tak siamah a puh bawk. "Israel-in Temple Mount leh Western Wall nen inzawmna an nei lo tia sawi chu, China leh Great Wall of China, Egypt leh pyramid te inzawmna an nei lo tih ang vel a ni. UNESCO hian an din chhan hi a hloh tawh a ni" a ti.