Thailand Crown Prince lallukhum khumtir hun tikhawtlai

Thailand lal, King Bhumibol Adulyadej-a aiawhtu tur, Crown Prince Maha Vajiralongkorn chuan a pa sun rih a duh avangin lallukhum khumtir hun tur chu tihkhawtlai a ni.

King Bhumibol hi kum 88 mi niin kar kalta Ningani khan a thi a, ram pumah an lal thi hi kum khat chhung an sun dawn a ni. Crown Prince hian a pa sun hun a tawp hnuah lal atana lakluh a duh a, a duh anga kalpui a nih chuan kum khat hnuah Thailand lal thar atan hian lakluh a ni ang. Mahse lallukhum khumtir a nih hma hian lal ṭhuthleng luah tur hian Legislature president chuan a sawm thei a ni.

Kum 64 mi, Crown Prince Vajiralongkorn hian lalṭhutthleng a luah hun tur sawn hla tura a ngen hnuah, Thailand sorkar chuan prime minister hlui, Prem Tinsulanonda chu lal aiawh lailawktu, caretaker atan a ruat a, a ni hian lal ṭhutthleng luahtu tur lakluh a nih hma chu lal ai a awh rih dawn a ni.

Prem hi kum 96 mi a ni tawh a, King Bhumibol-a hnuaia Privy Council-ah kum 1998 aṭang khan hotu niin, lal pawhin an mi rin tak a ni. Deputy Prime Minister Wissanu Kreangam chuan lal ailawh lailawktu tur ruat a nih thu a sawi a, mahse an mi ruat hming erawh a puang lang tel lo.