UN hotu-in Haiti tlawh

United Nations (UN) Secretary General Ban Ki-moon chuan kar kalta Inrinni khan Haiti ram a tlawh a, tunhnaia thlipui Hurricane Matthew-in chhiatna a thlenna hmunte a tlawh a, chhawmdawl hna thawktu hrang hrangte leh sorkar official-te a kawm.

Hurricane Matthew-in a nuai avangin Haiti ramah hian mi 900 chuang an thih bakah, chenna in tam tak a chhia a, ranvulh tam tak an thih bakah thlai chinna ram pawh a chhe nasa hle. Mi 175,000 chu chenna in nei loin an awm a, sorkarin an awmna lailawkna tur a siamah an khawsa mek a ni.

Ban chuan thlipui tuarte awmna hmun ṭhenkhat a tlawh a, an harsatna tawh mekte pui tura theihtawp an chhuah tur thu a sawi. Ram hrang hrang hnenah Haiti ram ṭanpuina tam zawk pe turin a ngen nghal bawk. Official-te chuan an ramin chhiatna nasa tak a tawh avang hian mi maktaduai 1.4 chuang chu ṭanpui ngaiin an awm mek niin an sawi.

Thlipui tuarte awmkhawmna hmunah tui hri, cholera a len mai a hlauh≠thawnawm hle nia sawi a ni. Kum 2010-a lirnghing na tak an tawrh ṭuma chenna neilote awmkhawmna hmunah khan cholera a lo leng tawh a, hri leng vang hian mi 10,000 dawn an thi a ni.

Haiti mipui, thlipui tuartu ṭhenkhat chu chhawmdawlna an dawn mai loh avangin an lungawi lo hle a, Inrinni khan chhawmdawlna phurtu motor ṭhenkhat an bei a, mipui pungkhawmte hi police leh UN sipaite chuan tear gas hmangin an hnawtdarh a ni. Ban chuan,"Chhawmdawlna nghak mek mipuite nghahhlelh dan leh thinrim dan tur pawh kan hriatthiampui a ni. A rang thei anga ṭanpuina thawn lut tur hian kan theihtawp kan chhuah mek a ni" a ti.