Iran-in Soleimani phuba lak a tiam US President-in Iran vau let

Iran ram hotu lu ber, Ayatol­lah Ali Khameinei chuan US sipaiten an thahsak, Quds Force hotupa General Qassem Soleimani phuba chu laksak ngei a tiam. 

General Soleimani hi kar liam ta Zirtawpni khan Baghdad international airport bula motor-a a chuang lai chu US sipaiten drone missile hmangin an kap a ni. General Soleimani bakah hian deputy commander Abu Mahdi al-Muhandis bakah midang panga an thi tel bawk.

US State department chuan December 31-a Iraqi Shia parmili-tary group, Kata'ib Hezbollah-te'n Baghdad-a US embasssy an beihna a thlawp avangin Soleiman hi an that tih a tarlang. Pentagon chief defence secretary, Mark Esper chuan US embassy chu beih a nih chuan phuba an la zel dawn tih a sawi bawk. 

Inrinni khan General Solei­mani hi Baghdad-ah vui a ni a, vuinaa tel an ṭhahnem hle. Vuinaa telte hian a phuba laksak an phut thu an sawi a ni. Khamenei chuan Soleimani thattute chungah phuba na taka lak a nih tur thu leh, he thil thleng hian US leh Israel an dodalna pawh a leta a tihchak tur thu a sawi. 

Khamenei chuan Quds Force hotu atan hian Deputy Commander, Brigadier General Esmail Ghaani chu a ruat nghal a; Soleimani hi Inrinni aṭang khan rampumah ni thum chhung sun a ni ang. 

 

Iran-in Soleimani phuba laksak a tiam thu a sawi hnuah US president Donald Trump chuan Iran hi vau let ve leh  nghalin, America mi emaw, US hmunhma emaw beih an nih  chuan US chuan Iran-a hmun 52 chu na takin a bei let nghal dawn tih a sawi. Trump chuan Iran-a hmun 52 chu an target nghal tih sawiin, heng zinga hmun ṭhenkhat chu Iran leh Iran culture tana hmun pawimawh tak tak an ni tih a sawi tel nghal bawk.

Inrinni khan Baghdad-a US embassy bula Green Zone chhungah rocket a tla a, khawpui hmarlama Balad air base pawh ṭum hnih kah a ni bawk. Mahse thi leh hliam an awm lo tiin Iraq sipaite chuan an sawi a, eng pawl mahin an tih an nih thu an la sawi lo.

US leh Iran inkar boruak ṭha lo hian Middle East oil supply thengin a nghawng nghal a, crude oil man pawh barrel khat US dollar 3 dawnina sang nghal a ni. Mahse Iraq oil ministry chuan an oil thawnchhuah kawng­ah nghawng buai a nei lo niin a sawi thung.