Khawvel Lawrkhawm

Standord University in solar plant hmang uar dawn

US-a Stanford University chuan campus-a electricity an hman aṭanga 50% chu ni zung chakna hmanga siam a tum a, hemi atan hian solar plant thar an siam chu an zo fel hnai tawh.

California-a Stanford University hi kum 125-a upa a ni tawh a, US-a private research university-a campus nei lian ber zinga mi a ni a, nikum Stanford Solar Generation Station project hi an kalpui ṭan a ni. Station hi California chhim lam, Kern County-ah an siam a, kumin November thla ral hmaa hman
ṭan theih beisei a ni. Plant-ah hian solar panel 150,000 chuang dah a ni a, siam zawh a nih hun chuan power megawatt 67 a pechhuak thei dawn a ni.

Philippines-ah tlang kang

Philippines khawpui, Manila chhimchhak lam km 250-a hla, Sorsogon province-a Bulusan tlang chu nimin zing 7.36 vel khan kangin, chirh sa nasa takin a vawrh chhuak.

Philippine Institute of Volcanology and Seismology (Phivolcs) chuan tlangkang hian km khat chuang zeta sangah chirh sa hi a vawrh chhuak niin an sawi a, mahse tlang chhip hi chhum thim chhah takin a khuh avangin eng ang taka nasa nge tih an la hre thei mai lo tih an sawi. Bulusan tlang bulṭhuṭa awmte chu tlang kang hi nasa zawka a thlen theih avangin, tlang aṭanga km 4 bial chhunga awm lo tur hriattir an ni. Thlawhtheihna te pawh tlang chhip lam hnaihah thlawk lo tura ngen an ni bawk.

Vietnam-ah tuilian vangin mi 24 thi

Vietnam ramah ruahsur nasa avanga tuilianah mi 24 an thi a, mi 150,000 vel chu hmun him lamah an insaseng tawh bawk. Chin hriat lohin mi pali an awm mek niin disaster official-te chuan an sawi.

Kar kalta Zirtawpni leh Inrinni-a ruahsur khan 90 centimeter a tling a, chenna in 125,000 chuang zet a chim a ni. Tuilian thlai chinna leh sangha khawina farm-te a tichhe nasa hle a, North-South Highway pawh a chhe bawk. Pathianni khan Typhoon Sarika chu Philippines hmarlamah a tleh bawk a, thlipui tleh vang hian mi 15,000 vel chu hmun him lamah an tlanchhia.