Iraq-in Mosul khawpui laklet tumin beihpui thlak ṭan

Iraq Prime Minister Haider al-Abadi chuan Islamic State (IS) kut aṭangin an ram khawpui lian pahnihna, Mosul khawpui lak let tumin an ram sipaiten beihpui an thlak ṭan tih nimin zing khan a sawi.

TV-a an ram mipuite hnena thuchah a sawiah, PM Abadi chuan, "Mosul lalet tur leh hnehna chang ngei turin beihpui thlak ṭan a ni. Hei hi Daesh (Islamic State) firfiakte pawikhawihna thlen ṭhin laka chhanchhuana tur che u a ni" a ti.

Iraq sipai leh anmahni thlawptu sipaite chuan tun hnaiah IS kut aṭang hian Qayyarah khua an la tawh a, he khua hi Mosul chhim lam km 60 vela hlaa awm a ni a, IS beihletna atana hmun pawimawh tak a ni.

IS firfiakte hian kum 2014 June thla khan Mosul khua hi an la a, khawpui an lak zingah lian leh pawimawh ber a ni. He khua hi sipaiten an lak let theih chuan firfiakte dinhmun hi a chhiat phah hle rin a ni.

Firfiakten Mosul khawpui an lak
aṭang khan he khuaa cheng zinga mi nuai sarih vel chu himna zawngin an tlanchhe tawh nia sawi a ni a, tunah hian khawpui leh a chhehvel bialah hian mi maktaduai 1.5 vel an la awm nia rin a ni. Mosul-ah hian IS firfiak hi 4,000-8,000 vel an awm rin a ni a, khawpui la let tura beihpui thlaknaah hian sipai 25,000 vel tirh an ni ang. US chuan Iraq sipaiten firfiakte laka beihpui an thlaknaah hian chung lam aṭangin a lo pui a, mahse khawmualah inbeihnaah erawh chuan a tel ve lo.

Iraq sipaite hian Pathianni zing khan Mosul khaw chhungah hian thlawhtheihna hmangin, khawpui la let tura sipaiten beihpui an thlak dawn avanga mipuite fimkhur tura an chahna lehkha an thlak a ni. Lei lam leh thlawhtheihna hmanga an beihnaah civil mite an bitum dawn lo tih an hriattir a, hemi rual hian tual≠chhung mite chu IS firfiakte tawmna hmun
aṭanga inthiarfihlim turin an hrilh bawk.