Donald Trump-a'n WHO tana fund pek titawp

United States (US) president Donald Trump chuan World Health Organisation (WHO)-a US-in fund a pek chu a tihtawp thu Thawhlehni khan a sawi. A thiltih hian ram leh pawl hrang hrangte dem zui a hlawh nghal hle. Donald Trump chuan khawvel puma hripui leng mek chungchangah a hma lak danah WHO hi a mawhphurhna hlen lohah a puh. Hleih neih taka thilti a, China lam awn leh ṭan bikah a puh bawk.

Trump chuan hri leng chungchanga China-in thu dik tawk lo a sawite chu WHO hian a lo thlawp a ni tiin, hei vang hian khawvelah pawh a darh phah zual a, WHO chuan mawh a phur tur a ni, tiin Thawhlehnia White House-a news conference a neihah a sawi. US hi WHO donor lian ber a ni a, kum 2019 khan chhawmdawlna hi US dollar maktaduai 400 chuang a pe a, hei hi WHO budget aṭanga 15% dawn a tling pha a ni. Hetih lai hian President Trump ngei pawh hi an rama hri leng chungchanga a hma lak danah sawisel a hlawh ve hle bawk a ni. US hi Covid-19 kai tamna ber ram a ni tawh a, mi nuai ruk chuangin kai tawhin hri kai thar an la pung zel bawk.

President Trump-a thutlukna siam chungchang hi WHO lam chuan a la chhang lo a, United Nations (UN) secretary-general Antonio Guterres erawh chuan WHO chunga ṭuan chu a hun lo hle tih a sawi. "Tun hi hri leng mek leh a nghawng pawi tak a thlen tur veng tura khawvel chu lungrual taka hna an thawh hun a ni," a ti. Australia prime minister Scott Morrison chuan Trump-a'n WHO a selna chu a hriatthiampui hle tih a sawi a, China-in sa zawrhna dawr 'wet market' a hawn thar leh chungchang WHO in a thlawp pawh chu thil awm lo tak a ni, a ti.

Hemi rual hian WHO chuan hri lenna ram hrang hrangah hna pawimawh tak a thawk mek a, thawhpui an ngai a ni, tiin a sawi. U.S. health advocacy group Protect Our Care chairman Leslie Dach chuan WHO chu an hnathawhna kawngah sawisel bo an ni lo a, tih dik tawk lo pawh an nei ngei a, mahse hri leng vanga khawvel pum a buai laia he pawl tana chhawmdawlna pek lo tihtawp chu pawisak neih lo leh dawn tawi thlak hle nia an ngaih thu a sawi.

American Medical Association president Dr Patrice Harris pawhin President Trump thutlukna siam dan chu thil ṭha lo tak a ni tiin, Covid-19 do letna kawngah hmalakna a ti harsa zual zawk dawn a ni, a ti.