SKorea-ah parliament inthlan nei

South Korea ramah chuan nimin zing dar 6 aṭang khan Parliament inthlan neih a ni. National Assembly seat 300 member tur thlangin mipuiten vote an thlak a, vote thlakna tur polling station 14,000 siam a ni. Hri leng avangin vote thlak turte chu hmaituamna leh kutkawr vuah vek tura tih an nih bakah, an khua a sik leh sik loh pawh endik sak nghal zel an ni.

An endiknaa an temperature 37.5 Celsius (99.5 Fahrenheit) aia sangte chu special booth-ah hruai nghal an ni. National Election Commission chuan Covid-19 vei, enkawl mek mi 2,800 pawh mail hmangin vote thlak phalsak an ni tih a sawi. Hei bakah hian inkhunghrang tura tih mek, mi 13,000 chuang pawh vote thlak phalsak an ni bawk a, mahse voter dangte tana hun hawn, zan dar 6 hnu lamah an thlak thei chauh thung. Coronovirus leng vangin ram tam takin inthlan neih hun pawh an sawn a, mahse South Korea erawh chuan a hun pangngaiah a nei thung. South Korea hian inthlan neih hun tura ruat hi a la thlak danglam ngai lo a ni.