Khawvel Lawrkhawm

Hitler-a pianna in thiat dawn

Nazi hruaitu, Adolf Hitler-a pianna in, Austria ram a mi chu ṭhiah a ni dawn tih Interior Minister Wolfang Sobotka chuan a puang.

In ṭhiah tur hi Upper Austria state-a Branau am Inn-a awm a ni a, expert team leh local offiical-te chuan he in tihchhiat hi an rel a ni. Cabinet chuan in ṭhiahna tur leh, a in neitu hnenah zangnadawmna pek dan turte a ngaihtuah leh dawn a, nakkum kumtir lamah in hi ṭhiah ṭan theih beisei a ni. A hmunah hian in thar sain, sorkar office atan emaw, charity lam tan emaw hman a ni ang. Sobotka chuan he in hi Nazi thlawptuten hmun thianghlim leh hriatrengna hmuna an neih tura dintir reng chu an duh lo tih a sawi.

New Zealand-ah electric motor pung chak

New Zealand ramah electric vehicle register (EV) awm zat chu kum hmasa aiin a letin a pung a, sorkar chuan kum 2021-ah electric motor hi 64,000 vel awm tir hman a tum.

Kumina EV register hi 1,003 a tling tawh a, kum 2015-ah khan 500 an awm. New Zealand-ah hian EV awm zat hi 2,029 a tling tawh niin Transport Minister Simon Bridges chuan a sawi. Minister chuan electric motor chu uar chhoh zel an tum tih sawiin, petrol leh diesel hmang motor aiin a senso a tlem a, boruak chhia pekchhuak ṭhin tihtlem kawngah pawh a ṭangkai hle a ni, a ti.

Thailand lal aiawh tur lakluh hmain ni 15 sun phawt dawn

Thailand Prime Minister Prayuth Chan-ocha chuan an lal thi ta, King Bhumibol Adulyadej aiawh lailawktu tur lakluh hmain ni 15 chhung sunna hun an hmang phawt dawn tih a sawi.

King Bhumibol hi kar kalta Ningani khan a thi a, ram pumah kum khat chhung sun a nih hnuah, a ruang hi halral a ni chauh ang. A aiawhtu tur, Crown Prince Vajiralongkorn chu a pa ruang halral a nih hnuah chauh lallukhum khumtir a ni dawn a, lal fapa pawh hian a pa sun phawt a duh thu a lo sawi tawh a ni. King Bhumibol sun a nih chhung hian lal aiawh lailawktu atan hian Prime Minister hlui, kum 96 mi Prem Tinsulanonda chu sorkarin a lo ruat tawh a ni.