China leh Russia tan Phillipines inhawng

Philippines President Rodrigo Duterte chuan an ram sipai leh US sipaiten kumtina indo nunchan an zir ṭhin chu, kumin bak neih chhunzawm a ni tawh dawn lo tih a lo sawi tawh a, hemi hnu hian China leh Russia sipaite chu nunchan zirpui a duh thu a sawi.

Thawhṭanni-a TV-a an kawmnaah, Duterte chuan China nena inlaichinna ṭha zawk siam a nih theih nan ram pahnih sipaiten nunchan an zir dun theih a duh thu a sawi.

Kumin June 30-a thuneihna a chan aṭang khan Duterte hian US a hlat sawt hle a, China leh Russia lam a hawi tawh zawk a ni. US hian Phippines rama ruihhlo laka indo puan kalpui a nih dan a sawisel ṭhin avangin Duterte hi a thinrim hle a, ṭawngkam pawhin a bei na hle. Ruihhlo do beihpui thlakna kal mekah hian mi 3,700 chuangin nunna an chan tawh a ni.

Philippines President hi nimin khan China-ah a zin a, sumdawng aiawh eng emaw zatin an ṭawiawm. China ramaa a cham chhung hian ram pahnihte chuan thawhdunna tur dollar tam tak hu inremna an ziah rin a ni. A zinchhuah hma hian China aṭanga ralthuam lei an tum thu a lo sawi tawh bawk.

Philippines President hmasa, Benigno Aquino hnuaiah khan Philippines leh China inkar boruak a ṭha lo hle a, China-in South China Sea-a a huang zauh a tum dodalna kawng khat atan, Aquino hian an rama US sipai tam zawk dah a remtih sak a ni. Hei bakah hian UN hnuaia tribunal-ah pawh thubuai thehlutin, July thla khan tribunal chuan China hi thiam loh a chantir a, mahse hei hi China chuan a pawmsak lo a ni.