Ethiopia-in ram dang palaite khuahkhirhna siam

Ethipia sorkar chuan an rama emergency a puan hnuah, an rama ramdang palai awmte chet vel danah khuahkhirhna a siam leh.

Sorkar chuan thuchhuah siamin, ramdang palaite chuan an ram khawpui, Addis Ababa aṭanga km 40 aia hlaah kal chhuak lo turin a ti a, hei hi an himna tur a ngaihtuah vang niin a sawi.

Nikum November thla aṭang khan Ethiopia rama hnam lian ber Oromo te chuan sorkar lakah lungawi lohna lantirin nawrh an huaihawt a, a hnuah hnam lian ber dawttu Amhara-te'n an zawm ve leh a ni. Nawrh huaihawtte hian a tirah chuan ram neitu nihna chanvo pek phutin an nuar a, a hnuah an huang zauh zelin, political, economic leh cultural rights te an phut leh a ni.

Emergency hnuaiah hian factory, farm leh sorkar hnuaia zirna inahte, zan dar 6 aṭanga a tuk zing dar 6 thleng curfew puan a ni a, kawngpui pawimawhte chu red zone-ah puangin, heng hmunah hian puak thei thil engmah ken phal a ni lo. Political party-te pawh buaina chawk chhuak thei lam hawi thuchhuah an siam khapsak an ni a, sakhaw hruaitute chu politics kaihhnawih thil engmah sawi lo tura tih an ni bawk. Emergency puan chhung hian security force-te chu chawlh lak phalsak an ni lo a, la lui an awm chuan an hna aṭanga ban nghal an ni ang.