Anthony Albanesei kaihhruai Australia sorkar thar la lut

Australia prime minister Anthony Albanese kaihhruai sorkar chu nimin khan a term hnihna atan lak luh a ni. Lak luh zawhah meeting hmasa ber an nei nghal.

PM Albanese leh a cabinet member 42 te hi Canberra-a Government House-ah lak luh an ni a, Governor-General Sam Mostyn chuan rinawmna thu a tiamtir a ni. Minister atana lak luh zingah 23 chu cabinet niin, a dang pasarih chu outer ministry member an ni a, assistant minister 12 an awm bawk.

Minister tam zawk hi term hmasaa minister lo ni tawh niin, deputy prime minister leh defence minister Richard Marles, treasurer Jm Chalmers leh foreign affairs minister Penny Wong te chuan an chanvo ngai an chelh chhunzawm leh.

May 3-a an ram inthlanpui neihah Albanese kaihhruai centre-left Labor Party chu hneh taka thlan tlin a ni. Vote hi chhiar kim la ni lo mah se Labor Party hian majority a nei tling tawh a, seat 150 awmna House of Representatives-ah seat 92-95 a lak phak beisei a ni. Sorkar hmasaah khan seat 78 an nei a ni.

Eptu pawl, conservative ṭangrual pawl chuan seat 41 an la thei dawn a, inthlan awm tawha an chet chhiat ber ṭum a ni.

Prime minister Albanese chu vawiin hian Indonesia president Prabowo Subianto hmu turin Jakarta-ah a zin dawn a, heta ṭang hian Pathiannia pope thar, Pope Leo XIV lak luh inkhawm hmang turin Rome a pan ang. Rome-a a awm chhung hian ram dang hruaitute hmuh a tum bawk.

Nimin khan eptu, Liberal Party chuan an party hruaitu thar atan minister hlui Sussan ley an thlang a, kum 1944-a din an party-in hruaitu atana hmeichhia an neihna hmasa ber a ni. A thlak tak, Peter Dutton khan inthlanah a chak zo lo a, eptu hruaitu ni chunga inthlana chak lo hmasa ber a ni.