UK PM-in visa rules khauh zawk siam a tiam

United Kingdom prime minister Sir Keir Starmer chuan immigration system siamṭhat a, visa rules khauh zawka siam a tiam. Visa diltute chu English test pawh khirh zawka neihpui an tum.

Ruahmanna siamah hian UK-a pem lut, inbenbel tumte chuan a hmaa kum ngaa phalna an neih ṭhin ang kha kum 10 an nghah a ngai tawh dawn a ni. Migration rules thar hi tih chhuah thuai beisei a ni a, 'system ṭha leh mumal, thununna khauh tak siam a ni dawn a ni," tiin PM chuan a sawi.

Sir Kier chuan an rama industry-te chuan ram chhunga thiamna neite chhawr loin, ram pawn lam aṭanga thawktu, hlawh tlem zawka an chhawr theih tur lak luh chu chin ṭhanah an nei a ni, a bikin engineering industry-ah a nasa zual niin a sawi. An system hman mek hian an ram ṭhalai, training ṭha tak nei thei turte a dang a ni, a ti.

Labour party in UK-a luh turte tana English thiam vek tura ruahmanna a siamah hian a luh turte an enkawl tur puitlingte pawh a huam tel a ni. PM chuan, "Kan rama rawn lutte chuan kan ṭawngte an zirin an thiam tur a ni," tiin a sawi. Hetih lai sawiseltu lam chuan English thiam vek tura phutna hian ṭawng thar zir lam harsat vangin chhungkua pawh a ti ṭhen thei dawn niin an sawi ve thung.

Oxford University Migration Obsevatory-in kum 2021-a zirchianna a neihah, UK-a pem lut mi 10 zinga pakua chuan nal takin English in an ṭawng thei a ni.