khawvel Lawrkhawm

NKorea-in SKorea President dem

North Korea chuan South Korea President Park Geun-hye-i'n NKorea ram a tluchhe mek tia a sawi chungchangah an dem thu sawiin, Korean ram pahnihte inkar boruak tihchhiat zual tumah an puh.

North Korea Committee for the Peaceful Reunification thupuangtu chuan,"Park-i'n a thil tum tak chu NKorea policy dik lo sawi punlun a, tuna buaina awm mek tihchhiat zual a ni" a ti.

President Park-i hi an ram Armed Forces Day hmannaa thu a sawiah, NKorea mipuie chu an ram tlanchhiatsan turin a sawm a ni. NKorea mipuite chuan zalenna, democracy, human rights leh welfare-te an chang ve tur a ni tiin a sawi. North lamin nuclear program a kalpui mek chu tihtawp loh chuan an ram sorkar chu a tluchhe mai dawn niin a sawi bawk.

Clinton-i'n hma la hruai zel

US President thlanna neih tura America mipuite ngaihdan lak hnuhnung berah Democratic party candidate Hillary Clinton-i chuan a khingpui, Republican party candidate Donald Trump-a lakah point sarih-in hma a la hruai.

Kar kalta Inrinni leh Thawhṭanni inkara mipui ngaihdan lak khawmah, US President atana Clinton-i duhtu hi 49% an awm a, Trump duhtu hi 42% an awm thung. Hmeichhe zingah Clinton-i duhtu hi an tam zawk a, Trump aiin point 17 zetin hmeichhia bikah hma a hruai a ni. Candidate pahnihte hian president debate vawi thumna chu nizan khan Lag Vegas-ah an nei leh a ni.

Jakarta khawpuiah sazu tihrem tum

Indonesia khawpui, Jakarat khawpui chhunga sazu tam lutuk tihrem tumin thuneituten hman an la a, sazu mante chu pakhatah dollar 1.50 zel pek an ni dawn.

Rat Eradication Movement chuan khawpui chhungah hian sazu maktaduai 10 vel an awm niin a sawi a, a bikin bawlhhlawh tamna hmun leh mi retheite chenna bialah an tam zual niin a sawi. Sazu-te hi hlauhawm leh natna pu darh thei an nih avangin sazu tihremna tura hmalakna an siam ta niin, Jakarta Deputy Governor Djarot Saiful Hidayat chuan a sawi a, hemi chungchang hi sorkar news website-ah tarlan a ni bawk. Sazu mante chu pakhatah dollar 1.50 zel pek an ni dawn a, mahse sazu man leh tihhlumna atan hian silai hmang lo turin mipuite an ngen. Sazu an man chu local official-te hnenah hlanin, an ni hian lawmman hi an lo pe nghal zel dawn a ni.