ISIS laka Iraq sipaiten beihpui an thlakah Mosul bula thingtlang khua la let

Iraq sipaiten Islamic State (IS) firfiak kut aṭanga an ram khawpui lian pahnihna, Mosul khawpui lak let tuma beihpui an thlaknaah, Mosul chhehvela thingtlang khaw eng emaw zat an lalet tawh.

Iraq sipai leh an thurualpui, Sunni leh Shitte Hashd Shaabi paramilitary unit-te chuan Lihoud, Abbasiyah, Khuder al-Yas, Bajwaniyah leh Tal al-Samen khua an la tawh a, Mosul chhim lam km 30-a hla, Sohura khua lak tumin an pan leh a ni. Khawchhak lamah Kurdish Peshmerga pawh firfiakte bei tur hian an inbuatsaih mek bawk.

Mosul khua hi Iraq khawpui, Baghdad hmarlam km 400 vela hlaa awm a ni a, kum 2014 June thla aṭang khan IS kutah hian a awm a ni. Firfiakten khawpui an lak hnu hian he khuaa cheng civil mi tam tak chu an tlanchhe tawh a, tunah hian mi nuai sarih vel an la awm nia rin a ni a, firfiak hi mi 5,000 vel an awm nia sawi a ni bawk.

US chuan Mosul khuaa civil mi awmte chu firifiakte hian inphenna atan an hmang ṭhin tih sawiin, an zinga tam tak chu hren luih an nih thu a sawi.

European Union chuan Mosul khuaa firfiak awm zingah EU ram mi eng emaw zat an awm a, sipaiten beihpui an thlak hnuah hian heng mite hi an ram lamah kirin, ram himna an tiderthawng thei tih a sawi a, fimkhur turin Europe ramte a chah nghal a ni.

Mosul khawpui lak let tuma beihpui thlaknaah hian Iraq sipaite bakah an thurualpuite nen mi 94,000 vel zet an thawk chhuak a, mahse firfiakte kut aṭanga khawpui pum la let tur chuan thla hnih vel a ngai dawn niin sipai hotute chuan an sawi. Iraq sipaite hi US kaihhruai ṭangrual ramte chuan indo thlawhtheihna hmangin an lo pui bawk.