Boko Haram helin an manten chhuah an duh lo

Nigeria helpawl, Boko Haram-te'n kum hnih liamtaa Chibok khuaa school naupang, hmeichhe tleirawl an mante chhuah turin sorkar nen inbiakna an nei mek a, mahse an mi man zinga hmeichhe 100 chuang zet chuan an mahni hrengtute chhuahsan an duh lo.

Hmeichhe tleirawl an man zinga ṭhenkhat chu helho hian nupuiah neiin fa nei tawhte pawh an awm a, hei bakah hian thluak an suksak tawh avangin tam tak hian kir leh hi an duh tawh lo niin, Chibok Development Association chairman Pogu Biturs chuan a sawi.

Nigeria sorkar leh Boko Haram-te'n inbiakna an ṭan hnuah kar kalta khan hmeichhia an hren zinga mi 21-te chu chhuah an ni a, Pathianni khan an chhungte kutah hlan an ni. Nigeria President Muhammadu Buhari chuan Boko Haram-te'n inbiaknaah organization-te tel an remtih chuan sorkarin inbiakna neihpui zel a duh thu a sawi.

Boko Haram hian kum 2014, April thla khan an ram hmarchhak lam, Chibok khuaa school beiin, school naupang hmeichhe tleirawl 276 an man a ni. Helho kut aṭang hian mi eng emaw zat chu an tlanchhuak a ni.