Khawvel Lawrkhawm

Africa ramten Israel nena inzawmna tha duh

Africa ramte chuan sumdawnna leh inpalai tawnna lamah Israel nena inzawmna ṭha neih an duh.

Ivory Coast rorellai, Rally of the Republicans party official Joel N'guessan chuan tunhma lama Africa ramte leh Israel inkar boruak ṭha lo awm ṭhin chu Arab ramten an nawrna vang niin a sawi. Mahse tunah chuan Israel nena inzawmna ṭha zawk neih an duh a, Israel pawhin Africa khawmualah investment ti se a duh thu a sawi. "UN-a Africa ramte thlawpna an neih theih nan, Israel chuan inpalai tawnna lamah ringawt ni lo, investment lam thlengin ṭan a lak vek a ngai dawn a ni" a ti. Tunhnaia UNESCO resolution-in Jerusalem leh Temple Mount chungchanga Israel rorel dan a sawiselna khan Africa ram, Cameroon, Guinea, Ivory Coast, Kenya leh Togo-te chuan an thlawp ve duh lo a ni.

US-ah voter inziaklut an thahnem

Kumin November thlaa US President thlanna neih turah vote thlak thei tura inziaklut chu maktaduai 200 chuang an ni a, US chanchina voter in inziaklut an tam ber ṭum a ni.

Ram puma voter inziaklut hi 200,081,377 an tling a, kum riat kalta chhung khan mi maktaduai 50 inziaklut thar an awm a ni. Kum 2008-a President thlannaah khan voter inziaklut hi maktaduai 146.3 an ni a, an zinga maktaduai 131.4 in vote an thlak a, vote thlak an la tam ber ṭum a ni. Kum 2012 inthlanah khan mi maktaduai 129.2 in vote an thlak.

TargetSmart chuan voter inziaklut thar zinga 42.6% hian Democratic lam an awn a, Republican lam thlawptu 29% awmin, 28.4% chuan indepen≠dent an duh zawk niin a sawi.

Rohingya-te chhawm­dawlna tur dan sak

United Nations hnuaia World Food Programme (WFP) chuan Rakhine state, Myanmar-a Rohinya Muslim-te chhawmdawlna pek tur chu sipaiten an dang niin a sawi.

Kar kaltaa Rohingya hel nia hriatten police post an beih vangin Rakhine state-ah hian sipai ṭhahnem tak tirh luh an ni a, inkalpawhnate pawh an dang a ni. WFP hian Rohingya muslim 80,000 vel, Bangladesh ramri bula awmte hi chhawmdawlna a pe
ṭhin a, mahse police-te beih an nih hnu hian sipaite chuan kawngpuite hi dangin, chhawmdawlna thawn luh tur pawh an dansak. Rakhine state-ah hian Ro≠hingya muslim leh buddish-te inkarah buaina nasa tak a chhuah huah Rohingya mi 125,000 vel chu relief camp-ah an la khawsa mek a ni.