Syria sipaiten ni thum inkahhai an puang

Syria sipaite chuan an ram khawchhak lam, Aleppo khuaa helho laka beihpui an thlak mekah, ni thum chhung inkahhai an puang tih an sawi.

Syria sipai hotu chuan thuchhuah siamin, ni thum chhung atan zing dar 8 aṭanga zan dar 7 thleng inkahhai an puang tih a sawi a, helho pawh an ralthuamte dah thla a, President Bashar al-Assad-a'n sipai kuta hel inpete ngaihdam an nih tur thu a chhuah chu hmang
ṭangkai turin a ngen.

Aleppo khuaa helho awmna leh an inkulhna te chu
chiang taka an hriat thu sawiin, sipai hotu chuan inkahhai an puan zawm lote chu na taka beih nghal an nih tur thu a sawi. Helho hian Aleppo khuaa chhungkaw tam tak chu inphenna atana hmangin an hreng mek niin a sawi bawk.

Nilaini tlai aṭang khan hel eng emaw zat chuan Aleppo khua hi an chhuahsan ṭan nia sawi a ni. Russia leh Syria sipaiten kalka tur bik atana an duan katlangin hel eng emaw zat, dam lo leh kum upa zawkte chuan Aleppo khua hi an chhuahsan mek a ni.

Khawpui chhuahsan duhte tan hian kawng bik pariat duan a ni a, heng zinga pahnih chu helho tana hman tura tih a ni. Mahse khawpui aṭanga hel kalchhuak turte chuan an ralthuamte an kalsan a ngai thung. A dang kawng paruk chu khawpui chhunga civil mi la tangkhang mekte kalchhuahna tur atana tih a ni.