Trump leh Clinton-te'n debate vawi thumna nei

US President thlanna neih tura Republican Party candidate Donald Trump leh Democratic Party candidate Hillary Clinton-te chuan an ram huna Nilaini zan khan debate vawi thumna an nei leh.

Debate vawi thumna hi Las Vegas, Nevada-a University of Nevada Las Vegas (UNLV) ah neih a ni a, candidate pahnih te hi ṭawngkamin an inbei na leh hle a, Russia President Vladimir Putin-a chungchangin hmun a luah lian hle bawk.

Hillary Clinton-i chuan Russia chu kumina US President thlanna neih tura inrawlh tumah leh, Democratic political organization data khawih sak chungchanga inhnamhnawihah a puh. Kum danga inthlana neihah ramdang sorkarin inrawlh an tum ngai lo tih sawiin, hetiang thil a thleng chu pawi a tih thu a sawi. Tun thla tir lam khan US intelligence agency-te chuan US polical party email hack saknaah Russia chu a inrawlh niin an lo sawi tawh a ni.

Donald Trump chuan inthlan neih tura Russia inrawlh tuma US sorkarin a puhna chu a hnawl thung. Russia Deputy Foreign Minister Sergey Ryabhov pawhin US puhna hi thu dik lo leh belhchian dawl lo a nih thu a sawi tawh bawk.

Clinton-i chuan Russia President Vladimir Putin-a'n Trump a thlawpna chhan chu a duh ang anga a chawhkual theih tur a nih vang a ni, a ti. Mahse Trump chuan Putin nen hian inzawmna an nei lo tih a sawi a, amah hriatna hranpa a nei loh thu a sawi. Inthlanah Clinton-i chak se a pawm dawn leh dawn loh pawh a sawichiang duh lo bawk.