Philippines hmarlamah thlipui a tleh

Philippines hmarlamah thlipui na tak, super typhoon Haima a tleh a, in leh school tam tak a lenchhiat bakah, thingkung tam tak a tlu bawk. He thlipui hi kum thum chhunga Philippine rama thlipui tleh tawh zinga a na ber a ni.

Super Typhoon Hiama hi Nilaini zan khan hmarlama Cagayan province-ah a tleh a, kum 2013-a thlipui Haiyan tleh nen tehkhin a ni. Haiyan thlipui tlehin chhiatna a thlen vanga thi hi mi 7,350 an tling tawh a ni. Philippine ramah hian kumtin thlipui, typhoon hi ṭum 20 vel a tleh ṭhin.

Haima thlipui tleh hian thlai chinna ram pawh a tichhe nasa hle a, hmarlama Luzon biala buh leh vaimim hmunte chu an tlu chhe vek nia sawi a ni. Thlipui tleh vang hian mi 90,000 vel chu hmun him lamah an tlanchhia a ni.

Cagayan province khawpui, Tuguegarao mayor Jefferson Soriano chuan thlipui tleh vanga mipuite inhumhimna zawnga an tlankhawmna, school leh gymnasium te pawh a chhe nasa hle tih a sawi a, in chungte a len chhiat avangin mipuite ṭanpui an ngai hle tih a sawi. Thlipui tleh vang hian thi leh hliam an awm hriat a ni lo.