Khawvel Lawrkhawm

Aleppo khaw miten ei tur tlachham tan

Russia leh Syria sipaiten Syria khawchhak lam, Aleppo khuaa hel laka beihpui an thlaknaah mi 500 dawn an thi tawh a, khawchhunga chengte chuan ei tur an tlachham ṭan tawh niin UN Secretary-General Ban Ki-moon chuan a sawi.

Ban chuan September 22 aṭanga Syria sorkarin ngawrh zawka Aleppo-a beihpui a thlak leh chuan chhiatna a thlen nasa hle tih a sawi a, thi zingah hian naupang 100 chuang an tel a ni, a ti. Mi 2,000 velin hliam an tuar bawk. Syria sipaiten Aleppo luhkate an dan vek avangin July 7 aṭang khan chhawm≠dawlna pe tute chu khaw chhungah an lut tawh lo a, tun thla tawpah chuan khaw chhung mite chuan chaw ei tur an nei tawh dawn lo a ni, a ti.

Japan-ah lir a nghing

Japan khawthlang lam bialah nimin chawhnu dar 2 vel khan magnitude 6.6-a nain lir a nghing a, mahse lirnghing vang hian tsunami a thlen a hlauhthawn loh niin meteorological agency chuan a sawi.

Lir nghin ṭanna hi Tokyoa khaw≠thlang lam mel 430-a hla, Tottori biala lei hnuai km 10-a thukah a ni. Thil tihchhiat lian tham a neih hriat a ni lo a, mahse hun rei vak lo chu in 32,000 velin electric supply an nei lo a ni.

Philippines-a thlipui tleh vangin mi 17 an thi

Philippines rama super typhoon Haima tlehin chhiatna a thlenah mi 17 an thi a, ruah a ken tel avangin thlai chinna ram zau tak tuiin a chim chhe bawk. Thlipui hian nimin khan Hong Kong lam a pan.

Philippines thuneitute chuan Ningani-a an ram nuaitu, typhoon Haima-in chhiatna a thlen te an enfiah mek tih an sawi a, hmarlam province-ah thlai chinna ram hectare sang tel chu a nuai chhia niin an sawi. Hong Kong-ah chuan nimin khan thlipui a thlen dawn vangin service pawimawh zual tih loh chu khar lawk vek a ni.