Duterte-a'n US lak aṭanga inlakhran thu a puang

China rama cham mek, Philippines President Rodrigo Duterte chuan an ram chu, hun rei tak a lo thawhpui tawh US lak aṭanga a inlakhran thu a puang.

Rodrigo Duterte leh China President Xi Jinping-te chu Ningani khan Beijing, Tiananmen Square-a Great Hall of the People-ah an inkawm a, ram pahnihte chu inṭhianṭha tak ni tura intiamin, South China Sea chungchanga buaina pawh chinfel dan kawng zawn an tiam. China President nena an inkawm zawh hnuah Duterte chuan US lak aṭanga an inlakhran thu hi a puang a ni.

Beijing-a sumdawng aiawhte nena meeting an neihah Duterte chuan, "US nen hian sipai lam leh economy lamah pawh kan inzawmna a tawp ta tih ka puang a ni" a ti. China leh Russia te thawhpui a tum zawk tih sawiin, Russia ramah zinin an president Vladimir Putin pawh kawm thuai a tum thu a sawi.

Duterte leh Xi-te hian ram pahnihte thawhdunna tur inremna thuthlung 13 ziah chu an enpui bawk. Ram pahnihte hian dollar tluklehdingawn 12.5 hu inremna an ziak leh dawn bawk a ni.

Philippines Presidential Communications Office chuan, China President hian an ram atan a pung hniam takin dollar tluklehdingawn 9 chuang loan pek a tiam tih sawiin, heng zinga hmun thuma ṭhena hmun khat chu private bank aṭanga pek a ni dawn tih a sawi. Philippines sorkarin an rama ruihhlo laka indo a puan mekah, ruihhlo ngaite enkawlna turin China chuan loan, dollar maktaduai 15 a pe dawn bawk a ni.