Ethiopia-ah mi 1,600 man tawh

Ethiopia rama emergency puan a nih hnuah mi 1,600 chuang man an ni tawh.

Oromia leh Amhara bialah sorkar laka lungawi lohna lantir a, tharum thawhna te a thlen avangin thla ruk chhung atan emergency hi puan a ni. Emergency dan hnuaiah police leh security force-te chuan arrest warrant tichhuak kher loin buaina chawk chhuak zawnga che leh dan kalha chea puhte chu an man thei a, emergency puan a nih chhung zawng tan tir theih an ni.

Man zinga a tam zawk hi tharum thawhna thlenga telte nia puh an ni. Anni bakah hian sumdawng ṭhenkhat, an dawr hawng duh lote pawh man niin, zirtirtu pathum chu school an kal chhunzawm duh loh vangin man an ni bawk.

Human Rights group chuan thla 11 kalta chhung khan sorkar laka lungawi lohna lantira nawrh huaihawtte leh security force-te inkara buaina thlengah mi 500 vel an thi tawh niin a sawi. Nawrh huaihawtte hian sorkar buildingte an beih bakah, sumdawnna hmun, a bikin ramdang mite ta an tihchhiatsak nasa hle.