International Criminal Court-ah SAfrica tel tum tawh lo

South Africa chuan International Criminal Court (ICC) aṭanga inlakchhuah a tum a, United Nations hnenah pawh a hriattir tawh a ni.

ICC hian Sudan President Omar al-Bashir-a chu an rama mi tam tak thihna thleng chung≠changah, mawhphurtuah puhin manna tur thupek a tichhuak a, nikuma South Africa-a African Union summit hmanga Bashir-a a zin ṭum khan man turin ti mah se, South Africa sorkar chuan a lo man duh lo a ni.

South Africa hian ICC aṭanga inlakchhuah a tum chungchanga thuchhuah a siam chu media-te hnenah pawh a copy a pe tel a, " Republic of South Africa chuan remna a awm theihna tura hmalakna tur nia a ngaih leh, International Criminal Court thiltih dan chu a inpersan hle niin a ngai a ni", a ti. Hetih lai hian parliament-in a pawmpui lohin SAfrica hian ICC hi a chhuahsan thei dawn em tih hriatchian a la ni lo.

Kar hmasa khan South Africa Prseident Jacob Zuma chuan ICC sawiseltu ram, Kenya a lo tlawh tawh bawk. ICC hian Kenya President Uhuru Kenyatta chu a mihring puite chunga pawikhawihna lian tak thlenah puhin thubuai siamsak a ni a, hei hi Kenya sorkar chuan a sawisel nasa hle. Mahse a thubuai hi finfiahna mumal a awm loh avangin tihtawp a ni.

Kar hnih liamta khan Burundi ram chuan ICC aṭanga chhuah a duh thu a lo sawi tawh a, African Union chuan an member ramte chu ICC chu Africa ram thliarhrangah puhin, thawhpui lo turin a lo ti tawh bawk.

ICC-ah hian member 124 awmin kum 2002 khan din a ni. ICC hian mi tam tak thihnaa mawhphurtua puh, mihring puite laka pawikhawiha puh leh, war crime chungchang a ngaihtuah ṭhin a ni.