EU-in pem luh tumte khuah­khirhna khauh zawk siam duh

European Union (EU) member ram 28-te chuan dan loa Europe rama pem lut, a bikin Africa ram aṭanga pem lut pung zel khuahkhirhna khauh zawk siam an duh.

Ningani khan ni hnih awh tur EU Summit chu Brussels-ah ṭan a ni a, he summit-ah hian pem lut leh raltlan pung chak avanga harsatna an tawh mek chinfel dan te, sumdawnna kawnga member ramte inkara harsatna awm leh Russia nena an inzawmna chungchangte an ngaihtuah a ni.

EU hruaitute chuan ramria khuahkhirhna khauh zawk siam te, dan loa pem lut pung zel tihtlem a nih theih nana Africa ramte inremna siampui dan kawng zawnte an rel a ni. October 6-a European Border and Coast Guard Regulation siam a ni chu lawmawm an nih thu sawiin, staff leh hmanruate dah belh zel an rel bawk.

EU leh Turkey-in migration deal an siam hnuah, kumina Aegean Sea kaltlanga Greece rama dan loa raltlan lut zat chu September thla khan nikum September thla aiin 98% zetin a tlahniam hman a ni. Hetihlai hian EU-in nakkum September thla ral hmaa raltlan 160,000 te EU ram hrang hranga sawndarh a tumna chu tihpuitlin a harsa dawn niin an sawi.