WHO hotuin US sum thawh tih tawp pawi a ti
United States president Donald Trump-in coronavirus leng mek chungchanga World Health Organisation (WHO) hma lak dana a lungawi loh avangin US-in fund a pek a tih tawp thu a puang chu pawi a tih hle tih WHO director general Tedros Adhanom Ghebreyesus chuan a sawi.
WHO hotu chuan US chu WHO ṭhianṭha leh a thawhpui ṭha tak, an pawl tana thilphal tak a ni a, a la nih chhunzawm zel pawh a beisei tih a sawi. Hemi rula hian ram hrang hrangte chu hri leng mek do let tura lungrual taka thawk ho zel turin a ngen. Tedros chuan an thawhpui ram hrang hrangte nena inhriatthiam lohna awm ṭhinte pawh siamṭhat zel a tum a ni, a ti.
President Trump hian hri leng dona kawnga WHO thiltih dan hi sawiselin, hleih nei leh China lam awn bikah a puh a ni. China thusawite chu WHO hian a thlawp tlat a, hei vang hian khawvelah hri hi a darh zual phah a ni tiin, WHO chuan mawh a phur tur a ni, a ti.
US President thiltih hi ram leh pawl hrang hrangin sawiselin an dem hle a, United Nations (UN) secretary-general Antonio Guterres chuan khawvel hripui leng vanga harsatna nasa tak a hmachhawn laiin, hri dona kawnga a hma la tur ber WHO hnena chhawmdawlna pek tihtawp chu a hun lo hle tih a sawi. Lungrual taka hri leng tih tawp a nih theihna tura thawhho hun a ni, tiin a sawi. Mi thiam tam tak pawhin president Trump thutlukna siam hi khawvel tan chauh ni lo, USA tan ngei pawh a ṭha dawn lo niin an sawi a ni.
Hri leng chungchangah WHO hi a hmain Taiwan pawhin a lo sawisel tawh bawk. March thla khan Taiwan chuan WHO chu Taipei-in Covid-19 hi mihring leh mihringah inkaichhawn thei nia a lan thu a sawi pawh ngaihsak tawk loah a lo puh tawh a ni. Associated Press report-ah pawh China chuan hri leng chungchangah mipuite zirtirna pe harah a puh a, hei vang hian a darh zau chak phah a ni, a ti.
Melinda Gates-in WHO tan USD mtd 150 thawh
Bill Gates nupui, Melinda Gates chuan khawvelin hun harsa tak a hmachhawn laia WHO fund pek tihtawp chu thil hlauhthawnawm tak a ni tiin, US-in fund pek a tihtawp hnuah WHO tan The Bill & Melinda Gates Foundation aṭangin US dollar maktaduai 150 an pek thu a sawi.
Melinda Gates chuan WHO chu khawvela hri leng mek dona kawnga thawktu a ni tiin, chak zawka hma a lak theihna tura puihna atan sum hi an pek belh tih a sawi a ni. Gates Foundation hi US tih lohah WHO donor lian ber dawttu a ni.