France aircraft phur lawnga thawk Sipai 700 dawnin Covid-19 an kai
France aircraft phur, Charles de Gaulle lawngliana chuang lawng sipai 668-te chu Covid-19 an kai tih France armed forces ministry chuan a tarlang.
France-a lawng sipai mi 1,767-te chu enfiah an ni a, heng sipai zinga a tam zawk chu Charles de Gaulle lawnga chuang an ni. Chung zingah chuan lawng sipai mi 668-te chuan hri hi an kai tih hriatchhuah a ni ta a ni.
Hri kai hriat chhuah zinga mi 31-te chu damdawi-inah dahluh nghal an ni. France lawng sipaite hi kar hnih liam ta khan Baltic tuipuia an awmna ṭhin aṭanga hawn tir an ni a, an zinga kal mi 40-te chu an awm danah tunlai hri natna an vei nia rinhlelh an nih avangin, he lai tuipui hi chhuahsan tir an ni zui ta a ni.
January 21 aṭanga khan France, Charles de Gaulle lawng sipaite hi Mediterranean hmarchhak lama France sipaiten Iraq leh Syria-a Islamic firfiakte an beihna kawnga pui turin an awm ṭan a, hemi hnu hian Atlantic leh Baltic tuipuia dah leh an ni.