Myanmar ambassador hlui court-a inlan turin ti

Britain-a Myanmar ambassador hlui, Kyaw Zwar Minn chu London-a ambassador chenna in a chhuahsan duh loh avangin British police-ten thubuai an siamsak a, May 30-a court-ah inlan turin an ti.

Kum 2021-a Myanmar sipaiin an rama civil sorkar rorelna hnehchhuh a, thuneihna an chelh hnu lawk, hemi kum April thla khan civil sorkar thlawptu, Kyaw Zwar Minn hi ambasador a nihna aṭangin an ban zui a ni. A thlaktu tur pawh an ruat nghal bawk.

Hetih laia Britain conservative sorkar chuan ambassor aṭanga ban tak hi venhimna an pek tur thu a sawi. Britain foreign minister hlui, Dominic Raab pawhin Myanmar sipai sorkar thiltih dan chu na takin a lo dem tawh bawk.

Minn-a ukil chuan kum 2023 khan police-te London hmarthlang lama ambassador chenna ina a la awm zel chungchangah Minn hi thu an zawtfiah tawh tih sawiin, Minn hian mipui thlan sorkar aiawh kutah chahbi chu pek a tum thu a sawi a ni, a ti. London police-te chuan Minn hi ambassador a nih tawh loh hnu pawha sorkar aiawh chenna tur hmuna a la awm luih zel avangin thubuai siamsak a ni tiin, May 30-a Westminster Magistrate court-ah inlan tura tih a ni.

Britain hi Myanmar-a democracy sorkar tundin a nih leh theihna tura nawrtu ram zingah telin, Myanmar sipai sorkar hnuaia member ṭhenkat hrekna pawh a lo siam tawh bawk. Myanmar sipai sorkar hian ambassador aṭanga Minn a ban hnuah kum 2021, July thla khan a thlaktu tur hi a ruat a ni. Britain hian Myanmar sipai sorkar hi pawm lo mah se, Vienna Convention on Diplomatic Relations hnuaiah Myanmar hian an ram palai tur a ruat chungchangah Britain pawmpuina hi a neih kher a ngai lo a ni.