Trump-a'n Putin leh Zelenskyy biak a tum

US president Donald Trump chuan Russia-Ukraine indo tih tawp a nih theih nan, Russia president Vladimir Putin leh Ukraine president Volodymyr Zelenskyy te chu vawiin hian phone-a biak a tum tih a sawi. Anni pahnih bakah NATO ram hruaitute pawh biak a tum thu a sawi bawk.

President Trump chuan Putin chu Ukraine do tih tawp chungchang a sawipui dawn tih sawiin, inbiakna ṭha tak neia inkahhai pawh an puan theih a beisei thu a sawi bawk. "Thleng lo tawp tur he indona hi tih tawp a ngai tawh a ni," tiin Truth Social-ah a sawi.

Russia thupuangtu, Dmitry Peskov pawhin President Putin leh President Trump te inbiakna neih tur atana an inbuatsaih thu a sawi ve bawk.

Kum 2022-a Russia-in Ukraine a run hnua a ṭum khatna atan, kar liam ta khan Russia leh Ukraine aiawhte chu Turkey-ah mi dang kaltlang loa inbiakna an nei a, mahse inkahhai puang turin an inrem thei lo a ni. Mi dang kaltlang loa inbiakna neih hi Russia President rawt ni mah se, inbiaknaah hian amah a tel ve lo thung. Ukraine president Zelenskyy-a'n presidential-level meeting neih a rawtna chu Putin chuan a hnawl.

Ram pahnihten inremna an siam theih loh hnuah, Russia chuan Inrinni zan khan drone hmangin Ukraine nasa takin a bei leh. Ukraine Air Force chuan Russia hian drone 273 vel a kap nia sawiin, heng zinga 88 chu an lo kap thla tih an tarlang.

Russia hianUkraine khawpui, Kyiv bakah Dnipropetrovsk leh Donetsk bial a kap a ni. Kyiv regional governor Mykola Kalshnyk chuan Russia beihna avang hian hmeichhe pakhat a thi a, mi pathum an hliam niin a sawi. Hetih lai hian Russia defence ministry pawhin Inrinni zan leh Pathianni zing khan Ukraine drone eng emaw zat an kap thla niin an sawi ve bawk.