Mexico navy lawngin Brooklyn Bridge a su

Mexico navy training lawng chuan Inrinni liam ta zan khan New York-a Brooklyn Bridge a su a, mi pahnih an thi a, hliam 19 an awm.

Police chuan navy lawng, Cuauhtémoc-ah hian mi 227 an chuang a, lawng hian power hlohin captain chuan a thunun thei lo a, lei hi a su ta tih an sawi. Hliam tuar zinga mi pahnih chu an dinhmun a ngaihtuahawm hle niin an sawi bawk. Lawng hi New York aṭanga Iceland pan tur a ni.

Kum 142-a upa, Brooklyn Bridge hi a chhe nasa lo nia sawi a ni a, lawng chetsual dan pawh hi chhuichian nghal a ni bawk. He lei hi kum 1883-a hawn niin, metre 490-a sei hi tower lian pahnihin a chelh a ni. Nitin he leiah hian motor 100,000 chuang leh kea kal mi 32,000 chuang an awm ṭhin nia chhut a ni a, khualzinten an tlawh nasat hmun a ni.

Mexico president Claudia Sheinbaum chuan an ram navy lawng chetsualna thleng leh, mi pahnihin nunna an chan chu pawi a tih thu a sawi. Mexico Navy pawhin an training lawng chetsual thu hi X ah tarlangin, lawng leh thawktute pawh ennawn an nih mek thu a tarlang.