US-ah thlipui tleh vangin mi 21 an thi

US-a Missouri leh Kentucky state-te chu kar liam ta kar tawp khan thlipuiin a nuai a, chhiatna a thlenah mi 21 an thi.

Kentucky governor Andy Beshear chuan Zirtawpni zana thlipui tleh vangin an state-ah mi 14 an thi tih sawiin, Missouri thuneitute chuan mi pasarih an thi tih an sawi ve bawk. In chim hnuaia tangte zawn hna thawh mek a ni bawk. Missouri official-te chuan an state chhungah thlipui tleh hian in 5,000 vel a ti chhia tih sawiin, in chung tam tak a la a ni.

Missouri leh Kentucky-ah hian thlipui tleh vangin Inrinni tlai lam thleng khan mi 140,000 vel chuan power supply an nei lo. Fire department chuan thli tleh natna hmunahte in tin an enfiah zui bawk.

US National Weather Service chuan Illinois pawh thlipui tleh thei dinhmunah a ding tih sawiin, Texas hmarlam pawhin an tawrh mai theih thu a sawi. US-a thlipui tleh ṭhinna bial hi 'Tornado Alley' tiin an sawi mai ṭhin a, heng hmunah hian kumtin May leh June thla velah thlipui hi a tleh ṭhin. Kentucky state bik hian kum 2000 aṭang khan May thla apiangin thlipui tleh hi ṭum nga vel an tuar ṭhin a, Missiouri hian ṭum 16 vel an tuar ṭhin bawk a ni.