Pope Leo XIV lawm luh a ni

Roman Catholic kohhran hruaitu atana thlan thar, Pope Leo XIV chu nimin khan Vatican-a St. Peter's Square-ah Mass buatsaihin pope atan lawm luh a ni.

Pope Francis a thih hnuah Vatican City-a conclave neihah a thlaktu atan Leo hi tun May 8 khan cardinal rualten an thlang a ni. Thlan a nih hnuah May 9 kha pope a nih anga Mass hmasa ber chu Sistine Chapel-ah a lo buatsaih tawh a ni.

Pope lawm luhna hun hmanah hian ram hrang hrang hruaitute an tel a, khawvel hmun hrang hrang aṭangin chhimtu mi sing tel an pungkhawm bawk. Ram hruaitu zingah hian US vice president JD Vance, Ukraine president Volodymyr Zelenskyy, Canada prime minister Mark Carney, Britain Prince Edward, Israel president Isaac Herzog, Argentina president Javier Milei leh Australia prime minister Anthonyh Albanese te an tel. Kristian pawl/kohhran dang 30 chuangin an aiawh an tir bawk.

Lawm luh a nih hmain Pope Leo XIV hi a vawi khatna turin St. Peter's Square-ah popemobile-ah a chuang a, pungkhawmte chuan “Viva il Papa” tiin an lo lawm a ni. Pope hian lawm luh a nih hnuah St Peter's Square-ah Mass a buatsaih nghal bawk.