Israel-in Gaza-ah chhawmdawlna thawn luh phalsak dawn

Israel chuan thla thum dawn Gaza Strip-a chhawmdawlna hrang hrang thawn luh tur a dansak hnuah, mipui mamawh zual thawn luh a phalsak dawn tih Pathianni khan a sawi.

Israel prime minister Benjamin Netanyahu chuan Gaza Strip-a chengten ei tur tlachham ṭanin, ṭam an hmabak mai dawn nia pawl hrang hrangten sawia an nawr hnuah, ei tur mamawh zualpui thawn luh chu a cabinet-in a remtih thu a sawi. Mahse hengte hi engtikah nge thawn luh a nih dawn leh, eng ang chin nge thawn luh a phalsak tur erawh sawichian a la ni lo.

Kumin kumtir lama Israel leh Hamas-in inkahhai thawh khatna an kalpui hnua a thawh hnihna chhunzawm tura inremna an siam theih tak loh hnuah, Israel hian Gaza-ah beihpui a thlak chhunzawm leh nghal a, March 2 aṭang khan Gaza-a chhawmdawlna hrang hrang - ei tur, damdawi leh an mamawh dangte thawn luh tur a dan sak vek a ni. Hei hi inkahhai puang tur leh, an mi hren mekte chhuah tura Hamas nawrna atana tih a nih thu a sawi.

Gaza Strip-a chhawmdawlna thawn luh hi May 24-a ruahmanna thar siam kalpui a nih hma chuan international organisation hrang hrang kaltlanga thawn luh a ni rih dawn niin official-te chuan an sawi.

Israel chuan Hamas hi an mi hrente chhuah vek a, inkahhai puanpui a duh a, indona tih tawp erawh a sawi tel lo. Mahse Hamas lam hian indona tih tawp a nih theihna atan Gaza Strip aṭanga Israel sipaite hnuhdawh vek an duh thung. Hamas laka beihpui an thlak thar leh hnuah, Israel hian tun hnaiah sipai reservist sing tel chu ko lehin, Israel chief of staff, Lt. Gen. Eyal Zamir chuan Gaza Strip pumah beihpui hi thlak tum a nih thu a sawi a ni.

Defence minister Israel Katz chuan Pathianni khan Foreign Affairs and Defence Committee hnenah, kar liam ta Nilaini Khan Yunis-a Israel sipaiten airstrike an neihah Hamas commander leh, an pawl hotu thi ta, Yahya Sinwar-a unaupa, Mohommed Sinwar chu a thi nia hriat a nih thu a hrilh. Israel Defence Forces lam chuan Sinwar thih thu hi official-in la puangzar lo mah se, airstrike an neiha thi hi amah ngei nia hriat a nih thu Katz chuan a sawi.