Joe Biden-a'n prostate cancer a vei

US president Joe Biden chu chi kawng cancer, prostate cancer a vei a, a lo darh nasa tawh niin doctor-te chuan an sawi.

Kum 82 mi, Biden hi kar hmasa lam khan zun lamah harsatna a neih avangin doctor-te a hmu a, Zirtawpni khan prostate cancer a vei tih hmuh chhuah niin, a cancer hi a ruh lamah pawh a lo darh tawh a ni. President hlui hi eng enkawlnate nge pek tur tih a doctor-te chuan an ngaihtuah mek a ni.

Prostate cancer hi Gleason score tih hmangin an cancer dan hi score siam a ni. Biden score hi 9 niin a nasa ber pawl, high-grade cancer a ni a, hmun dangah pawh a darh chak thei hle nia sawi a ni.

Biden-a'n cancer a vei tih hriatchhuah a nih hnua an ram hruaitu hrang hrangte chuan pawi an tih thu leh, dam ṭha leh thuai tura an duhsakna thute an hlan. President Donald Trump pawhin a nupui, Melania nen Joe Biden chu a dam ṭhat leh thuai an duhsak thu a sawi.

US mipaah cancer natna zingah skin cancer dawtah prostate cancer hi vei an tam ber niin Cleveland Clinic chuan a tarlang. US Centres for Diseases Control and Prevention (CDC) chuan mipa 100 zinga 13 chuan prostate cancer hi an vei nia sawiin, kum upat lamah vei theihna hi a sang zual niin a sawi a ni. Mahse he natna veite hi enkawl hma an nih chuan ṭha taka enkawl dam theih an nih thu an sawi bawk.