Gaza-ah chhawmdawlna phurtu truck an lut

Israel-in thla thum dawn Gaza Strip a hrek hnua mipui mamawh zualte luh phalsak a ni dawn tih a puan hnuah, Thawhṭanni khan chhawmdawlna phurtu truck chu Gaza-ah luh tir ṭan an ni.

Kerem Shalom crossing kaltlangin truck panga an lut a, hengte hian naute leh naupang ei tur bakah, mipui mamawh zualpui a phur a ni. UN truck pali pawh luh phalsak an ni bawk. Motor dang pawh luh tir chhunzawm zel tum a ni.

Inkahhai puan a nih lai khan Gaza-a chengte chhawmdawlna tur hian an mamawh phurtu truck 600 vel chu nitin luh tir ṭhin a ni. Mahse, March 2 aṭang khan Israel chuan ei tur, damdawi leh mamawh dang phurtute hi a dang vek a, motor lut an awm lo.

UN humanitarian hotu, Tom Fletcher chuan truck luh tir an ni ta chu thil lawmawm tak a nih thu a sai a, hetih lai hian mipuite mamawh a san tawh avangin Thawhṭania lutte hian tuifinriata tui mal far ang chauh a la ni tiin, tam zawk thawn luh chhunzawm zel a nih a beisei thu a sawi.

Israel-in Gaza mipui mamawh zual thawn luh a phalsak tur thu a sawi chu UK, France leh Canada chuan an mamawh phuhruk tan a tawk lo hle tih an sawi. Thuchhuah inṭawm siamin Israel-in Gaza leh West Bank a bei thar leh a nih chuan Israel laka hrekna na tak siamah an vau zui bawk.

Israel prime minister Benjamin Netanyahu chuan ram pathumte thuchhuah siam hi na takin a sawisel ve nghal.