Brazil President hlui Bolsonaro thubuai ngaihtuah ṭan

Brazil Supreme Court chuan an ram president hlui, kum 2022 inthlanpuia a chak zawh loh avangin inthlan result hnawl tuma criminal organisation ho a, sorkar paihthlak tuma puh Jair Bolsonaro thubuai chu Thawhṭanni aṭang khan a ngaihtuah ṭan.

Bolsonaro thubuai ngaihtuahnaah hian kar hnih chhung thuhretu hrang hrang koh an ni dawn a, an zingah hian sipai hotu lam leh ram hruaitute pawh an tel ang. Thuhretu hi mi 80 chuang koh an ni ang.

Kum 70 mi, army captain hlui, Bolsonari hi kum 2019-2022 khan Brazil President a ni a, 2022 inthlanah Luiz Inacio Lula da Silva a hneh ta lo a ni. A thubuaiah hian thiam loh chantir a nih chuan kum 40 thleng lung-in tantir theih a ni dawn a ni.

Bolsonari chuan an puhnate chu thu dik lo niin a sawi thung a, politics-a inbeihna zawk niin a sawi. Hetih lai hian sorkar paihthlak tuma puh a nih bakah, President thar Lula, a vice president Geraldo Alckmin leh judge de Moraes te thah tuma puh a ni bawk.

Supreme Court hian Bolsonaro bakah a thurualpui nia sawi mi dang pasarih chungthu a ngaihtuah dawn bawk. An zingah hian minister hlui pali, navy commander hlui leh a president laia intelligence service hotu pawh an tel.