Washington-a inkahna thlengah Israel embassy-a thawk mi 2 an thi

US khawpui, Washington DC-a Jewish museum bulah an ram huna Nilaini zan khan inkahna a thleng a, Israel embassy-a thawk mi pahnih an thi. Capital Jewish Museum hi FBI field office bul hnaia awm a ni.

Metropolitan Police hotu, Pamela Smith chuan inkahna thlenga thite hi mipa leh hmeichhia an ni a, Capital Jewish Museum-a hun an hmang zo an haw lam chu mi paliten an lo kap niin a sawi. Pawikhawihtu zing ami nia rinhlelh pakhat, Chicago mi Elias Rodriguez (30) chu inkahna thlen hma lawk hian museum pawn lamah a tei vel hmuh niin, inkahna thlen hnuah museum-ah a tlan lut a, security force-ten an lo man niin Smith chuan a sawi. Man a nih hnuah pawh Palestinian te zalenna phutin a la au zui niin a tarlang.

Israel ambassador, Yechiel Leiter chuan mi sualten an kahhlum mi pahnihte chu inhual mai tur an ni a, a mipa hian zungbun pawh lei tawhin kar leh lamah Jerusalem-a inhual tum an ni, a ti.

UN-a Israel ambassador Danny Danon chuan inkahna thleng chu a dem thu sawiin, Israel huatna lantirna huatthlalawm tak a ni, tiin a sawi. Jewish Federation of Greater Washington pawhin pawikhawihna thleng chu an dem thu sawiin, thi chhungte an tuarpui thu an sawi.

US president Donald Trump chuan Washington-a inkahna thleng chu Juda huatna kalpuinain a nghawng zel a ni tiin, he thil hi tih tawp a ni tawh tur a ni, a ti. US-ah inhuatna leh inthliarnain hmun a nei lo, a ti. US secretary of state Marco Rubio pawhin pawikhawihtute chu an man chhuak ngei dawn a, an phu ang hremna pek an ni dawn tih a sawi.

Israel prime minister Benjamin Netanyahu chuan khawvel ram hrang hranga Israel embassy-ah venhimna ṭha zawk siam a ni dawn tih sawiin, Juda mi leh Israel ram huatna kalpuina thleng ṭhin nghawng rapthlak tak chu an hmu zel tih a tarlang.